İyunun 15-də ADA Universitetinin parkında “Ədəbiyyat bu gün və onun milli dirçəlişdəki rolu” mövzusunda şeir gecəsi keçirilib.

525.az xəbər verir ki, gecə ADA Universitetinin və Baku Book Center-in birgə təşkilatçılığı ilə reallaşıb.

Baku Book Center-in direktoru Günel Anarqızı və ADA Universitetinin  icraçı prorektoru Fariz İsmayılzadənin moderatorluğu ilə keçirilən görüşün qonaqları Xalq yazıçısı Anar və Xalq şairi Sabir Rüstəmxanlı oldu.

Milli Qurtuluş günündə keçirilən gecədə ADA Universitetinin rəhbərliyi, tələbələr və məzunlar, dövlət və özəl qurumların təmsilçiləri, eləcə də  Azərbaycan Yazıçılar Birliyinin nümayəndələri iştirak etdilər.

ADA Universitetinin rektoru Hafiz Paşayev bu cür tədbirlərin tələbələrin mənəvi inkişafının gücləndirilməsinə öz töhfəsini verdiyini və ənənəvi olmasının vacibliyini söylədi.

Ümummilli Lider Heydər Əliyevin vətəndaş cəmiyyətinin formalaşmasında rolunu vurğulayan Anar və Sabir Rüstəmxanlı qeyd etdilər ki, insanlar bütün zamanlarda azadlıq düşüncələrini sözlə ifadə edib və məhz ədəbiyyat həmişə ən vacib söz azadlığı platforması olub.

44 günlük Vətən müharibəsinə, Qarabağ mövzusuna toxunarkən, qonaqlar bu mövzunun Azərbaycan ədəbiyyatının, söz-sənət adamlarının daim izlədiyi məsələ olduğunu vurğuladılar.

Qonaqlar qeyd etdilər ki, uzun illərdən bəri düşmən tapdağı altında qalmış torpaqlarımızın işğaldan azad olunması Azərbaycan xalqının özünəinamını qaytardı, xalqın öz liderinə, onun gücünə etibarını daha da möhkəmləndirdi.

Sonra tədbir ədəbi hissə ilə davam etdi. Gecədə ADA Universitetinin tələbələri Azərbaycan, ingilis və rus dilində yazdıqları və Vətənə həsr etdiyi şeirlərini söylədilər.