Fevralın 17-də Azərbaycan Yazıçılar Birliyində yazıçı, tərcüməçi Kamran Nəzirli ilə Gənc Ədiblər Məktəbi üzvlərinin görüşü keçirilib.

 

Tədbiri Birliyin katibi, GƏM rəhbəri Rəşad Məcid açaraq yazıçının ədəbi yaradıcılığından bəhs edib: "Kamran Nəzirli artıq neçə illərdir ədəbiyyat sahəsində böyük ciddiyyətlə, təmkinlə fəaliyyət göstərən çox istedadlı yazıçımızdır. Hər zaman ədəbi yanaşmaları, yaradıcılığı ilə seçilib və diqqət çəkib. Eyni zamanda tərcüməçilik fəaliyyəti ilə də məşğuldur. Xarici ölkələrdə qatıldığı tədbirlər, iştirakçısı olduğu görüşlər isə ədəbi əlaqələrin qurulması baxımından çox dəyərlidir".

GƏM üzvlərilə görüşdən məmnunluğunu bildirən K.Nəzirli müasir dünyada ədəbiyyatın mövqeyindən və durumundan, mütaliə səviyyəsindən danışıb: "Yetişməkdə olan nəsillər, elə bil, gur internet məkanında azıblar, ruhsuz kompüter ekranından gələn saysız-hesabsız informasiya axınıyla gedirlər. İnsan kitabdan uzaq düşüb. Halbuki kitab min illərdi insana xidmət edib, onu təkamülə və tərəqqiyə qovuşdurub, onun şüurunu, əxlaqını, zövqünü, biliyini təkmilləşdirib, formalaşdırıb. Kitab insana heç vaxt xəyanət etməyib, amma insan edir. Kitab həm də dünyanı dərk etməyin bir yolu olub. Sənətkar da, filosof da məhz kitab vasitəsilə böyük və məşəqqətli yolla min illər ərzində qoşa addımlayıblar. Hər ikisinin mayasında kitaba, insana, həyata sevgi mühüm yer tutub. İndi bu sevgiyə də böyük təhlükə yaranıb".

K. Nəzirli deyib ki, mexaniki qüvvələr insanı fani maddiliyə çevirirlər: "İkinci Dünya Müharibəsinin üstündən heç 70-80 il keçməyib, görün yer üzündə nə qədər silah-texnika yaradılıb. Yeni-yeni maşınlar, silahlar, texnikalar icad edilib, bu minvalla sanki insanın bədəni böyüyür, qəlbi isə kiçilir. Çünki bu qəlb daha o sürətlə böyüyən insan bədənini idarə edə bilmir. Bizim dünyanın mənəvi-əxlaqi və siyasi-sosial problemləri də elə bu uyğunsuzluğa görədir. Mexaniki qüvvə ruhi qüvvəyə üstün gəlir. İnternet kitaba üstün gəlir. Bəli, mexaniki qüvvələr insanı fani maddiliyə çevirir, onun ruhunu və şüurunu robotlaşdırıb ona əbədi sahib olmaq istəyirlər".

Yazıçının fikrincə, internet uzunmüddətli təsir gücündə deyil: "Kitab isə daha uzunömürlüdür. Məsələn, götürək elə klassik inciləri. Onlar hələ bundan sonra neçə yüz illər əhəmiyyətini itirməyəcək, oxunacaq. Kağız müsbət enerji mənbəyidir. Hər halda, həkimlər, psixoloqlar bu fikirdədirlər ki, monitorun qarşısında çox oturmaq zərərlidir və bunu insanlar əvvəl-axır anlayacaq, yenə kitaba üz tutacaqlar".

Yazıçı çap məhsullarının, kitab istehsalının artırılmasının vacibliyini bildirib: "Yalnız bu zaman insanın sosial-mədəni həyatı onun mənəvi-əxlaqi dəyərləri ilə həmahəng olar, şüurlarda və psixikada pozuntuların qarşısı alına bilər. İnsan cəmiyyəti nə qədər bilikli və savadlı olursa-olsun, onun şüurunun robotlaşdırılmasına yol vermək olmaz. Çünki robotların qəlbi yoxdur, onlar sadəcə informasiya ötürə bilərlər, nəsil yaratmırlar, onlar insanın yaratdığı nəsillərə duyğu ötürə bilməzlər. O duyğuları və hissləri yalnız kitab verə bilər, kompüter yox".

Gənc ədiblərlə görüşü çoxdan arzuladığını bildirən yazıçı tədbirin qarşılıqlı dialoq şəklində qurulmasını təklif edib. K. Nəzirli "Müasir ədəbiyyatın gələcəyi" adlı müzakirə mövzusu açıb. Yazıçı polemikaya qatılan gənc yazarların dünyagörüşü, ədəbi düşüncələri ilə yaxından tanış olub. Gənc ədiblər fikir müxtəlifliyi səbəbindən klassik ədəbi ənənə və avanqard ədəbiyyat tərəfdarları olaraq iki hissəyə ayrılıb. Bəziləri bildirib ki, bir qisim gənclər yenilik etmək, avanqard yollar axtarmaq adıyla ədəbiyyatın nüfuzuna xələl gətirirlər. Bu mənada, onlar klassikadan bəhrələnməyin əhəmiyyətini önə çəkiblər. Avanqard ədəbiyyat tərəfdarları isə ədəbi çərçivələrin dağıdılması, yeni qəliblərin axtarışı fikrini irəli sürüblər.

Sonra gənc ədiblər şeirlərini oxuyublar. K. Nəzirli öz tərcüməsində müxtəlif şairlərdən poetik nümunələr səsləndirib.

Sonda K. Nəzirli gənc yazarlar üçün kitablarını imzalayıb.

 

AYB.az

Şərh yaz


Təhlükəsizlik kodu
Yenilə