08.04.2016-cı il  tarixdə  AYB-nin  Beyləqan  bölməsinin və  Beyləqan Gənclərinin  Maariflənməsi İctimai Birliyinin təşəbbüsü ilə  Beyləqan rayon  Peşə  məktəbinin  əməkdaşları, Beyləqan  rayon  MKS-nin əməkdaşları və  Beyləqan rayon Uşaq Yaradıcılıq Mərkəzinin əməkdaşlarının  iştirakı ilə  cəbhə bölgəsinə  yaxın  ərazidə  yerləşən  Hərbi  Hospitalda son günlərdə məlum  erməni terrorçularının təxribatı ilə Azərbaycanın ayrılmaz hissəsi olan  doğma Qarabağımızda  qoşunların təmas xəttində dinc əhaliyə qarşı  hücum edən mənfur düşmənlərimizlə döyüşdə yaralanmış hərbiçilərimizlə görüş  keçirildi.  Görüşdə Hərbi Hospitalın rəisi yaralı əsgərlərimizin yüksək səviyyədə  müalicə olunduğunu xüsusi qayğı ilə təmin olunduqlarını söyləyərək  görüşə gəlmiş bütün  iştirakçılara minnətdarlığını bildirdi.  Sonra Beyləqan rayon Peşə məktəbinin direktoru Nazim Məmmədov çıxış edərək  tezliklə yaralı hərbiçilərimizin sağalıb hərbi hissələrdə  yüksək əhval ruhiyyələ  Vətən uğrunda, qələbə uğrunda xidmət etmələrini arzuladı.

Sonra Beyləqan rayon Tarix-Diyarşunaslıq Muzeyinin direktoru Mehriban İsgəndərova, Beyləqan rayon MKS-nin direktoru  Gültəkin Məmmədova, AYB-nin  Beyləqan bölməsinin əməkdaşı Rövşən Budaq, Beyləqan Gənclərinin Maariflənməsi İctimai Birliyinin icraçı direktoru Arzu Rəhimov yaralı əsgərlərimizin tezliklə sağalıb qələbə müjdəsilə evlərinə, ailələrinə dönmələrini arzuladılar.

Söhbət zamanı Hospitalın  rəisi  yaralı hərbiçilərin  bir hissəsinin  sağalaraq ön cəbhəyə qayıtdığını bir  hissəsinin  də mərkəzi Hospitallara  yollandığını söylədi.

Qoşunların təmas xəttində gedən döyüş zamanı qələbənin  ilk  mərhələsinin sevincini yaşayan həm də  bütün Azərbaycan xalqına bu  sevinci  yaşadan vətənpərvər hərbiçilərimizdə böyük ruh yüksəkliyi var idi.  Onlar tezliklə  sağalıb ön cəbhəyə dönəcəklərini söylədilər.

Sonda  bütün ziyarətçilər gətirdikləri  sovqatları hərbiçilərimizə təqdim etdilər.

AYB-nin Beyləqan bölməsi