27 may 2016-cı il tarixdə saat 16 radələrində rayon mədəniyyət sarayının oxu zalında AYB-nin Beyləqan bölməsinin təşkilatçılığı ilə “Şərqin ilk  müstəqil dövləti” Respublika günü qeyd olundu.  Tədbirdə rayon İcra Hakimiyyəti nümayəndəliyi, Mərkəzləşdirilmiş  Kitabxana Sistemi işçiləri, Beyləqan rayon Mədəniyyət Sarayının əməkdaşları, şair və yazıçılar iştirak etdilər. Tədbiri AYB-nin  Beyləqan bölməsinin sədri  A.Cəfərli açdı və Respublika günü  münasibətilə  geniş  məruzə  etdi.  Sonra rayon   Mərkəzləşdirilmiş  Kitabxana Sisteminin direktoru Gültəkin Məmmədova,  əməkdaşlardan Qəmər Fərhadova, Lalə Haciyeva çıxış etdi. AYB-nin  üzvü  E.İsrafiloğlu 23 aylıq Müstəqilliyimiz dövründə  hakimiyyətin  apardığı işlər haqqında  məlumat verdi.  Rayon Mədəniyyət və Turizm Şöbəsinin inspektoru  İfrat müəllim  Müstəqilliyimizin dövlətimizə, mədəniyyətimizə  verdiyi tövhələrdən danışdı. Sonra İcra Hakimiyyətinin nümayəndəsi Azər müəllim  ikinci müstəqillik dövründə H.Əliyev dühasından, prezidentimiz İ.Əliyevin  apardığı uğurlu siyasətdən danışdı. ATİAHİ-nin  Beyləqan komitəsinin  sədri Tahir Həsənov müstəqillik  dövrü  təhsilimizdə olan  davamlı inkişafdan danışdı.  Şairlərdən E.Kərimoğlu,  V.Əhmədbəy,  F.Əsəd,  Araz Elsevər,  Rövşən Budaq müstəqilliyimiz haqqında  yazdıqları  şeirləri oxudular.

AYB Beyləqan bölməsi