Elə darıxıram ki,

az qala evdən çıxıb

sənin arxanca gəlsin

mənim ayaq izlərim

Ay balaca xanımım,

Mən sən boyda sevməyi

Axı harda gizlədim?

Vallah, qəlbin qəribədi

Nə qıfıl düşür, nə açar

Gəl,mənlə söz güləşdirmə

Bir qucaqlıq canın var.

Elə gülümsədin ki,

bütün bu  ağlamaqlar

dodaqlarında  itdi

Eh, balaca xanımım,

Sənlə müqayisədə

xoşbəxtlik çox bəsitdi

Durub səndən baxanda

Darıxmaq da gözəldi

Özümdən qaçan hisslərim

Sənə çatıb gözlədi

Gözlədi ki, yapışıb
tutasan barmağımdan
“Səni sevirəm” sözün
Beləcə, bir öpüşlə
alasan dodağımdan.

Eh anam da deyir ki,

“Qonşu qızı gözəldir

Əlindən hər iş gəlir”.

Başa sala bilmirəm

mənim yorğun ürəyim

bircə sənlə dincəlir.

Vallah, mən öyrəşmişəm
Qucaqlayıb saçını
gecələr tək yatmağa
Neynirəm bir oyanmağı,
gecələr bir yatmağı?
Mənə bircə əl lazımdır
əllərindən tutmağa.

Ay balaca xanımım,

nəyə lazım evdarlıq?

Lap yemək duzlu olsun

...Soyuq çay, çirkli yataq

Neynirsən bu daş-qaşı

Bu isti xəz paltonu?

Geyin köhnə çəkməni

Gəl gedək xoşbəxt olaq.

Aqşin Evrən