Azərbaycan Yazıçılar Birliyinin "Natəvan" klubunda Yazıçılar Birliyinin sədri, Xalq yazıçısı Anarla "Qobustan" jurnalının redaksiya heyəti,  Azərbaycan Dövlət Pedoqoji Universitetinin Filologiya fakültəsinin tələbələri və Bakı şəhəri 308 nömrəli məktəbin şagirdləri ilə görüş keçirilib.

525.az xəbər verir ki, görüşü giriş sözü ilə "Qobustan" jurnalının baş redaktoru, yazıçı Pərvin Nurəliyeva açıb. O bildirib ki, ilk sayı 1969-cu ildə Anar müəllimin təsisçiliyi və redaktorluğu ilə nəşr olunan "Qobustan" jurnalı uzun bir fəaliyyət yolu keçib. Toplu bu illər ərzində ölkədə və dünyada baş verən mədəniyyət hadisələri, sənət yenilikləri, araşdırmalar, incəsənət adamlarının yaradıcılığı ilə bağlı materialları oxucuların ixtiyarına verib. Əlli üç illik  yaradıcılıq  yolu keçən "Qobustan" jurnalı  bu gün də öz fəaliyyətini uğurla davam etdirir: " Biz daim gənc filoloq  tələbələrlə jurnalın əlaqəsini qurmağa çalışırıq. Onların bir çoxu artıq jurnalımız ilə əməkdaşlıq edir.  Düşünürəm ki, bu əlaqə gənclərin yetişməsinə müsbət təsir göstərir, onlarda araşdırmaçı  peşəkarlığının yaranmasına kömək edir. Tələbələrə stimul vermək, onları yaradıcılığa həvəsləndirmək  üçün jurnalın hər nömrəsində onlara yer veririk. Redaksiyanın əməkdaşları ilə məsləhətləşib belə qərara gəldik ki,  bir müsabiqə  təşkil edək, yaz sayımız haqqında ən dolğun xülasə yazan, video-çarxlar hazırlayan tələbələri mükafatlandıraq.

Təbii ki, "Qobustan" jurnalının adı çəkilincə, onun yaranması və yaşamasında böyük əməyi olan  dəyərli yazıçımız Anar müəllimin xidmətlərini qeyd etməliyik.  Universitetdə dərs dediyim ilk gündən tələbələrimə  tövsiyəm bu olub ki, əgər bir filoloq kimi dilimizi, ədəbiyyatımızı, yazı sənətini öyrənmək istəyirsinizsə,  o zaman  Xalq yazıçısı Anarın  yaradıcılığını yaxşı oxuyun. Müşahidə edirəm ki, tələbələr Anar müəllimin  yaradıcılığı ilə çox maraqlanır, onun əsərlərini sevə-sevə mütaliə edirlər. Bu günki görüş də  daha çox tələbələrin arzu və istəyi ilə reallaşıb.  

Tədbirdə AYB-nin sədr müavini Rəşad Məcid, Xalq artisti, tanınmış rejissor Ramiz Həsənoğlu, AYB-nin katibi Səlim Babullaoğlu, mətbuat katibi Xəyal Rza, şair Ramil Əhməd və başqaları iştirak edib.  

Tədbirboyu  tələbələr Xalq yazıçısı Anara onun yaradıcılığı və əsərləri ilə bağlı suallar ünvanlayıb. Gənclərin maraqlı suallarına özünəməxsus yumor və məntiqlə cavab verən yazıçı alqışlarla qarşılanıb.

308 saylı məktəbin direktoru Təranə Məmmədova da çıxış edərək şagirdləri üçün yaradılmış bu fürsətə görə təşəkkürlərini bildirib: "Bizim ən çox oxuduğumuz və şagirdlərimizlə birgə müzakirə etdiyimiz yazıçıdır Anar müəllim. Hər zaman onun əsərlərindən danışanda suallarımız yaranırdı. Bu gün belə görüşü təşkil edib suallarımızı ünvanlamaq şəraiti yaratdığınıza görə hər birinizə minnətdarıq".

"Qobustan" toplusundakı 50 illik fəaliyyətinə görə AYB-nin fəxri fərmanı ilə təltif olunan  publisist Esmira Nəzərli çıxış edərək jurnaldakı fəaliyyətindən danışıb: "Mən  jurnala işə gələrkən 21 yaşım vardı. Bütün gəncliyim, həyatım bu redaksiyada keçib. O zaman Anar müəllim də çox gənc idi. O, jurnalda qaynar yaradıcı mühit yaratmışdı. Biz ondan yaradıcılıq, peşəkarlıq, prinsipiallıq, humanizm və insanlıq dərsləri öyrənirdik. "Qobustan" bu gün də mənim üçün çox əzizdir. Mənə göstərdiyiniz diqqətə görə, Anar müəllimə, jurnalın redaktoru Pərvin xanıma və bütün kollektivə öz minnətdarlığımı bildirirəm".   

Xalq yazıçısı Anar çıxış edərək "Qobustan" jurnalının əməkdaşlarına, tələbə və şagirdlərə öz minnətdarlığını bildirib: "Qobustan" jurnalı mənimçün çox doğmadır. Yarım əsrlik bir yol keçən "Qobustan" da çox istedadlı, yaradıcı insanlar çalışıb. Təəssüf ki,  bu jurnalda illər əvvəl çalışdığımız kollektivdən yalnız iki nəfər: bu gün sənət  yubileyini qeyd etdiyimiz Esmira xanım və mən həyatdayam. Sevinirəm ki, bu gün jurnal öz fəaliyyətini daha da inkişaf etdirib, çoxillik ənənəni unutmadan yeni metodlarla işini davam etdirir, gənclərin bu jurnalla əməkdaşlığı çox müsbət haldır. Bugünkü tədbirdə iştirak edən gənclərin intellektual  düşüncəsi, ədəbiyyata olan həvəsi, polemik cəsarəti məni çox sevindirir. Qeyd edim ki, gənclərlə görüşə hər zaman hazıram. Bir az bundan əvvəl "Siz daha çox harada yaşamaq və kim olmaq istəyərdiniz?" sualını verən tələbəyə isə cavabım belədir: -Vətəndə yaşamaq və həmişə özüm olmaq!" 

Tədbirdə müsabiqənin qalibi elan olunmuş gənclərdən Rəna Sadıqova, Əli Əlizadə, Nəzrin Əlizadə, Elvira Əlixanova və Ayçin Məmmədovaya "Qobustan" jurnalının fəxri diplomu təqdim edildi. 

Maraqlı sual-cavab və diskussiyayla keçən tədbirin sonunda xatirə şəkilləri çəkdirildi.      

Narıngül NADİR