Bu dəli könlümün sirrli məkanı
Deyildi yerlərin tozu torpağı
Yerdəki yarını axtarmırdı o
Sonsuz səmalardı onun oylağı

Nə odlu baxışlar onu sarardı
Nə bir insan oğlu onu arardı
Hədəfsiz oxlara o nişan oldu
Könlümü bir dəli göylərdən saldı

Sevgilim,ovunu yaman haqladın
Bu könlü qəfəsə salıb saxladın
Ahınla qəlbimi sən alışdırdın
Sanki bu az imiş özün ağladın

Nə yaxşı sən məni göylərdən saldın
Məni əzizlədin dərdimə qaldın
Tanrı görüşdürüb bizi,istəsə
Bəlkə də sən mənə,mən sənə qaldım

Göylərdən enmişəm bir sənin üçün
Odlandım bir  közdən bir sənin üçün
Qoşa qanad olub gəl pərvazlanaq
Elə qayıtmışam bir sənin üçün