(Şeir şəhid Elmir Əliyevin xatirəsinə həsr olunur)

Sən dünyadan gedəndən qəm-kədərdir yoldaşım

Qəlbi dağ-dağ dağlanan anan olsun baş daşın

Ağlar qoydu bacısın, qırdı belin qardaşın

Yandı bağrım, belə qəm sinəmi dəldi laylay

Mənim balaca balam kəfəni geydi laylay

Bu nə yaman gedişdi, söndü evim-eşiyim

Sən hara tələsirdin,  ay mənim sonbeşiyim?

Rahat yat, Şəhid balam, anan çəkər keşiyin

Məni viran eylədi balamın dərdi laylay

Üzünü də görmədim, tabutu gəldi laylay

 
Bu çarəsiz dərdimə dağlar, daşlar ağlasın

Qız gəlin qəm-kədərdən qara yaylıq bağlasın

Nolar yazıq bacısın bircə yol haraylasın,

Dayağıydı qardaşın, çiynində getdi laylay

Neylədim mən fələyə bu dərdi verdi laylay?

 
Hələ də gözləyirəm, gəl, mənim Elmir balam,

Ürəyimdən keçəni bil, mənim,Elmir balam,

Ananın göz yaşını sil, mənim Elmir balam,

Sənsiz mənə cənnət də səhradı, çöldü laylay

Öldü, arzularım da səninlə öldü laylay