Ürəyinə sözlər dolur,

Kəlmələr, cümlələr dolur.

Dinə bilmir gözlər dolur

Niyə axı lal doğulur,

Bir ananın bir övladı?!

Baxır günəş işiğına,

Dünyanın yaraşığına,

Sanki Tanrı qarğışına

Gəlib, kardır qulağı

Bir ananın bir övladı!

Göy qurşağı rənglərini,

Həyatın ahənglərini,

Çiçəklərin bəzəyini

Görməkdən məhrum gözləri,

Kədərli bütün sözləri.

Bir ananın bir övladı!

Uşaqlarla oynamağa,

Əl-qol atıb "qaynamağa"

Güc göstərib ola arxa,

Yox təpər dizində qalxa

Arabanın möhtacıdı

Bir ananın bir övladı!

Allahım eşit fəryadı,

Analar əldə Qurandı.

Gecə-gündüz dua edir,

Sənə ümid, sənə gümandı!

Analara et imdadı,

Olmasın bəxti qaralı!

Bir ananın bir övladı

Solmasın qəlbi yaralı!