Anamın ilk laylasıdır,

Varlığımın mayasıdır.

Suvarılıb qanım ilə,

Ruhum ilə yoğrulubdur.

Düşüncəmin sacı üstə

Canımdakı atəş ilə,

Alov ilə qovrulubdur

Dilim mənim.

Dağ havası, yovşan ətri

Gəlir, sanki,nəfəsindən...

Dalğaların səsi gəlir

Dinlədikcə gur səsindən.

Coşub-daşır dəniz dilim,

Çeşmələrin suyu kimi

Təmiz dilim...

Köpələrin qəlbləritək

Saf qalıbdır.

Uluların müdrikliyi

Xislətində kök salıbdır.

Əzəl gündən

Sevməyibdir dəbdəbəni,

Bərbəzəkdəm,

Təmtəraqdan uzaq dilim.

Böyük ilə böyük olub

Uşaq ilə uşaq dilim...

Dönüb həzin bayatıya,

“Cahargaha”, “Heyratı”ya.

Meydanlarda girib cəngə

“Ruhani”tək, “Dilqəmi”tək,

Babam Babək Xürrəmitək.

Xətainin məsləkindən,

Qeyrətindən hopub qalıb...

Nəsiminin, Füzulinin

Ürəyindən qopub qalıb

Dilim mənim...

Əsrlərlə təknəsinə,

Süfrəsinə göz dikilib.

Özgələrin arşınıyla

Yaxasına söz biçilib,

Ətəyinə söz tikilib,

Yad kəlmələr arasında

Sıxılıbdır qərib kimi.

Fəqət tale sınağından

Çıxıb yenə qalib kimi...

Qovuşubdur azadlığa,

Yetişibdir istiqlala

Bu gün mənim məğrur dilim,

Uğur dilim, qürur dilim...

Ən mötəbər məclislərdən

Neçə yüksək ünvanlardan

Eşidilir çox vüqarla.

Amalımı, məramımı

Bəyan edir iftixarla.

Bir xitibət kürsüsütək

Hər qondarma bəyanata,

Siyasətə dayan ,deyir.

Dayan deyir, yalanlara,

İşğallara, talanlara.

Fikirləri haçalanan,

Öz içindən parçalanan

Millətlərə oyan, deyir...

Kükrəyərək çəkinmədən

Həqiqəti car eləyir.

Haq danışıb bədxahların

Dünyasını dar eləyir.

Açır isti qucağını

Hər bir bəşər övladına,

Mərhəmətdir, məhəbbətdir,

Cəsarətdir dilim mənim.

Millətimin sabahına

Zəmanətdir dilim mənim.

Vətən kimi, torpaq kimi

Nəsillərə əmanətdir,

Dilim mənim, dilim mənim...